Víðir skoraði flottasta markið í 3. umferð

Eyjamaðurinn Víðir Þorvarðarson skoraði flottasta markið í 3. umferð Pepsi-deildar karla í fótbolta að mati lesenda Vísis en kosið var á milli fimm fallegustu markanna hér inn á Vísi. Lesendur Vísis fá tækifæri til að kjósa fallegasta mark hverrar umferðar í allt sumar.

Rúmlega 300 atkvæði bárust að þessu sinni og fékk mark Víðis um 62 prósent þeirra. Það má sjá fimm fallegustu mörkin í 3. umferðinni hér fyrir ofan en Gary Martin, Nichlas Rohde, Kennie Knak Chopart og Jóhann Birnir Guðmundsson skoruðu hin fjögur mörkin sem komu til greina.

Markið hans Víðis tryggði ÍBV eitt stig á heimavelli Íslandsmeistaranna en það skoraði hann eftir laglegt upphlaup frá miðju og með glæsilegu skoti í fjærhornið.

Kosning fyrir besta mark fjórðu umferðarinnar hefst í kvöld hér inn á Vísi.