Gaui Þórðar hafnaði erlendu liði í janúar

Guðjón Þórðarson hefur verið án þjálfarastarfs síðan honum var sagt upp störfum hjá Grindavík síðastliðið haust.

Guðjón staðfesti í útvarpsþætti vefsíðunnar 433.is að hann hefði fengið tilboð frá erlendu félagsliði í janúar. Hann gaf ekki upp hvert umrætt félag væri en sagði að sér hefði ekki litist á aðstæður og hafnað því.

Þá telur Guðjón mestar líkur á því að KR, sem Skagamaðurinn þjálfaði sumarið 1994 og 1995, verði Íslandsmeistarar.

„Ég held þeir séu bara með þannig kjarna og innkoma Brynjars (Björns Gunnarssonar) er vanmetin,“ sagði Guðjón. Guðjón fékk Brynjar Björn til sín til Stoke á sínum tíma fyrir 600 þúsund pund og telur þjálfarinn reynslumikli að kaupin hafi verið ein sín bestu í brúnni hjá Stoke.