Rætt um að fá Phil Neville til ÍBV

Bradley Simmonds hefur farið ágætlega af stað með ÍBV í Pepsi-deildinni. Þessi 19 ára strákur, sem áður var á mála hjá QPR, er ánægður með lífið á Íslandi.

"Ég vildi komast úr því að spila varaliðsbolta í að spila alvörufótbolta og þess vegna kom ég til Íslands. Það er mikill munur á þessu. Boltinn er kannski aðeins hraðari á Englandi en það eru margir góðir leikmenn hér," segir Simmonds í viðtali við Sky.

Hann býr með landa sínum David James, markverði ÍBV, í Eyjum og Simmonds segir að komið hafi til greina að fá fleiri kempur til félagsins.

"Möguleikinn á að fá Phil Neville hingað var ræddur," sagði Simmonds en Neville var að hætta hjá Everton og ætlar að leggja skóna á hilluna.

"Það er frábært að búa með James og aldrei leiðinlegt. Maðurinn kann margar frábærar sögur. Ég mun líka læra mikið af honum um hvernig á að hugsa um sjálfan sig."