Hvatt til skordýraáts

Meira skordýraát á heimsvísu gæti hjálpað til í baráttunni við hungursneyð. Þetta kemur fram í nýrri skýrslu frá Matvæla- og landbúnaðarstofnun Sameinuðu þjóðanna.

Í skýrslunni kemur fram að skordýr séu nú þegar hluti af mataræði meira en tveggja milljarða manna, en að Vesturlandabúum finnist tilhugsunin um skordýraát ógeðsleg og því væri æskilegt að breyta.

Samkvæmt skýrslunni eru skordýr talinn fýsilegur matarkostur vegna þess að þau eru næringarrík og fjölga sér hratt. Veitingahús og önnur fyrirtæki í matvælaiðnaði eru hvött til þess að nota skordýr í mat, og bent er á að í mörgum löndum Afríku séu þau álitinn herramannsmatur.

Þá er bent á að skordýr gefi frá sér minna af mengandi lofttegundum en búfénaður, sem gerir skordýraátið umhverfisvænan kost.

Skýrsluna í heild sinni má lesa með því að smella á hlekkinn hér fyrir neðan.