Fjögur 1. deildarlið duttu út úr bikarnum í kvöld

Joseph David Yoffe skoraði þrennu fyrir Selfoss og Hilmar Árni Halldórsson var með þrennu fyrir Leikni í kvöld þegar lið þeirra tryggðu sér sæti í 32 liða úrslitum Borgunarbikarsins. Fjögur 1. deildarlið féllu út úr bikarnum í kvöld en það voru KA, Fjölnir, Haukar og KF.

KA tapaði mjög óvænt fyrir D-deildarliði Magna, Fjölnir tapaði fyrir C-deildarliði KV en bæði Haukar og KF féllu út fyrir öðru liði í 1. deildinni, Haukar á móti Víkingum en KF á móti Völsungi.

Joseph David Yoffe skoraði þrjú mörk og Ingi Rafn Ingibergsson var með tvö mörk í 5-2 sigri Selfoss á ÍR en Arnór Björnsson skoraði bæði mörk ÍR-inga.

Hilmar Árni Halldórsson skoraði þrjú mörk og þeir Aron Daníelsson, Dánjal á Lakjuni og Ólafur Hrannar Kristjánsson voru með eitt mark hver þegar Leiknir vann 6-0 sigur á Njarðvík.

Hjörtur Júlíus Hjartarson og Igor Taskovic skoruðu mörk Víkinga í 2-0 sigri á Haukum.

 

Brynjar Orri Bjarnason og Davíð Steinn Sigurðarson skoruðu mörk KV í 2-1 sigri á Fjölni en Aron Sigurðarson jafnaði leikinn með marki úr vítaspyrnu. Sigurmark Davíðs kom mínútu fyrir leikslok.

Ásgeir Sigurgeirsson og Gunnar Sigurður Jósteinsson tryggðu Völsungi 3-1 sigur á KF með því að skora báðir á lokamínútunum. Nenad Zivanovic kom KF í 1-0 en Ásgeir jafnaði í 1-1 fyrir hálfleik.

Upplýsingar um markaskorarar eru meðal annars fengnar frá úrslit.net.

Úrslitin í Borgunarbikar karla í kvöld:

KA - Magni 1-2    

Ýmir - KFR 3-1

Víkingur R. - Haukar 2-0    

KV - Fjölnir 2-1

Stál-úlfur - Grótta  1-2

Þróttur R. - Afturelding 4-2          

ÍR - Selfoss 2-5    

Leiknir R. - Njarðvík 6-0

Skínandi - HK  1-2

KF - Völsungur    1-3

Önnur umferðin klárast á morgun og það verður síðan dregið í 32 liða úrslitin á miðvikudaginn en þá verða öll Pepsi-deildarliðin í pottinum.