FH-ingar ósáttir við ummæli Gylfa Orra

Knattspyrnudeild FH  hefur sent Knattspyrnusambandi Íslands kvörtun vegna ummæla formanns dómaranefndar sambandsins um brottvísun fyrirliða FH-inga. Þeir krefjast þess að ummæli hans verði dæmd dauð og ómerk og að leikmaðurinn verði beðinn afsökunar.

Guðjóni Árna Antoníussyni, fyrirliða FH-inga, var vísað af velli skömmu fyrir leikslok í leik FH og ÍBV í Pepsi-deild karla á fimmtudagskvöldið. Gylfi Þór Orrason, formaður dómaranefndar KSÍ, sagði í samtali við Vísi á föstudag að ákvörðun dómarans í leiknum hafi verið rétt þrátt fyrir að um óviljaverk hafi verið að ræða.  

Jón Rúnar Halldórsson, formaður Knattspyrnudeildar FH, segir í samtali við Stöð 2 að formaður dómaranefndarinnar gefi í skin heigulshátt leikmannsins; að hann hafi fyrst og fremst verið að hugsa um að meiða ekki sjálfan sig.

„Undir þessu getum við FH-ingar ekki setið og krefjumst þess að ummælin verði dæmd dauð og ómerk og að leikmaðurinn verði beðinn afsökunar“, segir formaður knattspyrnudeildar FH í samtali við Stöð 2.

Ummælin sem FH-ingar eru ósáttir við má sjá hér að neðan. Frétt Vísis af málinu má sjá hér.

„Ef að þú horfir glöggt á myndbandið sérðu að leikmaðurinn er fyrst og fremst að hugsa um að meiða sig ekki sjálfan. Hann er lítið að hugsa um hvort hann geti skaðað andstæðinginn, þó að hann taki hann í fangið og huggi hann eftir á.“



Sportið á Vísi er komið á Facebook. Fylgstu með.