Ég hef greinilega fitnað

„Tilfinningin er frábær, eins og tilfinningin að vera alltaf að vinna. Það er gott og mikilvægt fyrir okkur Eyjamenn, bæði áhorfendur og okkur sjálfa, að byrja vel,“ sagði Hermann Hreiðarsson spilandi þjálfari ÍBV.

ÍBV vann 1-0 sigur á Skagamönnum í fyrsta leik ÍBV undir stjórn Hermanns í efstu deild.

„Ég hef greinilega fitnað því giftingarhringurinn var alveg pikkfastur á mér, en það á víst að taka þetta af sér,“ sagði Hermann.

Vísaði hann þar í vandræði sem hann kom sér í undir lok leiksins. Þá skipti hann sjálfum sér inn á og var látinn taka giftingarhringinn af fingri sínum.

Hermann segir ástæðuna fyrir því að hann kom inn á vera þá að hann hafi verið hávaxnastur á bekknum og þeir hafi viljað verjast löngu boltunum frá Skagamönnum.

„Í fyrri hálfleik stýrum við leiknum, skoruðum eitt gott mark og fengum nokkur færi í restina þegar þeir ýttu liðinu framar,“ sagði Hermann.

Hermann sagðist einnig vera feginn því að lengsta undirbúningstímabili heims væri lokið.

Nánari umfjöllun um leikinn má sjá hér fyrir neðan.