Sleppa fram af sér beislinu í vernduðu umhverfi hópsins

„Þetta hefur þekkst lengi og kallað ýmsum nöfnum svo sem múgsefjun eða hópþrýstingur,“ segir Einar Gylfi Jónsson sálfræðingur.

Fjallað var um hegðun stuðningsmanna á íþróttaleikjum hér á landi á Vísi í gær. Einar Gylfi segir í viðtali við Reykjavík Síðdegis að fjöldi rannsókna sé til vitnis um að hægt sé að fá fólk til að gera alls konar hluti við aðstæður þar sem hópurinn leiðir einstaklinginn í ákveðna átt.

„Ég stend mig til dæmis sjálfur að því þegar ég horfi á körfubolta að það eru nokkrir sem sitja fyrir aftan mig sem eru alltaf að skammast í dómaranum. Ef ég passa mig ekki er ég kominn með í þetta,“ segir Einar. Hann hafi ekkert við dómarann að athuga en það skipti ekki öllu máli.

„Þegar maður mætir á íþróttaleiki sem áhorfandi getur maður leyft sér ýmsilegt í nafni þess að vera í fjöldanum. Eitthvað sem maður myndi aldrei gera einn síns liðs eða ef það væru bara örfáar hræður á pöllunum,“ segir Einar Gylfi.

Stuðningsmenn Þróttar sem kalla sig Köttara eru þekktir fyrir að láta húmorinn og gleðina ráða för. Sungnir eru fyndnir söngvar sem eru oft í skrýtnari kantinum. Einar Gylfi segir um sama fyrirbæri að ræða. Menn taki þátt í nafni fjöldans.

„Ef einn hefði staðið og sungið þeirra söngva hefði hann verið talinn skrýtinn,“ segir Einar Gylfi. Þar sem hópurinn taki þátt líði öllum vel.

„Ein ástæðan fyir því að við mætum á völlinn er hve gaman er að vera í hóp og taka þátt í að búa til fagnaðaróp, æsa sig, segja misjafnt við dómara en svo eru þeir sem ganga lengra.“

Almar Guðmundsson, formaður knattspyrnudeildar Stjörnunnar, ræddi einnig við Reykjavík Síðdegis í gær. Silfurskeiðin, stuðningssveit Stjörnunnar, sendi frá sér yfirlýsingu þar sem hún baðst afsökunar á ummælum sínum í garð Bjarna Guðjónssonar, leikmanns KR á dögunum.

„Ég held að yfirlýsingin sé tiltölulega skýr. En af því við viljum vera rétttsýnir finnst mér mjög mikilvægt að það komi skýrt fram að stuðningsmenn Stjörnunnar hafa yfirleitt í gegnum tíðina verið sjálfum sér og félaginu til sóma með skemmtilegri og liflegri framkomu. Og jákvæðri,“ segir Almar.

Hann staðfesti að hann hefði sjálfur rætt við Bjarna Guðjónsson og það hefðu forsvarsmenn Silfurskeiðarinnar einnig gert.

„Þetta má ekki fara út í svona hluti. Það er engum til framdráttar og allra síst fyrir yngri iðkendum hjá okkar.Við viljum að þeir sjái fyrirmyndir á vellinum og ekki síst í stúkunni,“ sagði Almarr.

Hægt er að hlusta á viðtalið við Einar Gylfa í spilaranum fyrir ofan. Viðtalið við Almar í heild sinni má nálgast hér.

Sportið á Vísi er komið á Facebook. Fylgstu með.