Daily Mail fjallar um Íslandsævintýri James

Breski miðillinn Daily Mail er með stóra umfjöllun um Íslandsævintýri markvarðarins David James í dag. Bretarnir mættu til Eyja og fylgdust með James spila sinn fyrsta leik í Pepsi-deildinni.

Rætt er við James, Hermann sem og þá Matt Garner og Ian Jeffs sem einnig leika með ÍBV í umfjölluninni.

James segir meðal annars í viðtalinu að hann taki verkefnið á Íslandi alvarlega. Hér er hann að stíga sín fyrstu skref í þjálfun og hann segist vera meira en til í að hjálpa þeim sem vilja.

"Hér get ég gert svo margt. Ég er til í að þjálfa hvern sem er, unglinga eða kvennaliðið. Ég hef sagt þeim öllum að ef einhver vill koma á aukaæfingu þá sé það lítið mál. Í síðustu viku var ég með þrjár æfingar á dag," segir James við Daily Mail.

"Ég kom ekki hingað bara til þess að spila fótbolta. Það hefði verið löng leið til þess að spila bolta. Reynslan að spila erlendis hjálpar mér. Ég er búinn að spila rúmlega 970 leiki og það hefur aldrei verið neitt kappsmál að ná 1.000. Ég vil vera með í að byggja upp þetta lið og þjálfa. Aðalmarkmiðið er að gera ungu markverðina betri og koma þeim í liðið. Ef það tekst verður þetta tímabil árangursríkt."

Umfjöllunin er skemmtileg og hana má sjá hér.