Margra milljóna króna eignir kyrrsettar

Sérstakur saksóknari hefur kyrrsett margra milljóna króna eignir þeirra sakborninga, sem grunaðir eru um brot á gjaldeyrislögum. Þar er einkum um að ræða fasteignir, skuldabréf og hlutabréf.

Vísir greindi frá því í gær að sérstakur saksóknari hefði ákært fjóra menn fyrir brot á gjaldeyrislögum sem samkvæmt ákæru voru framin á átta mánaða tímabili á árinu 2009. Hinir ákærðu eru Markús Máni Michaelsson, Karl Löve Jóhannsson, Gísli Reynisson og Ólafur Sigmundsson.

Í ákæru segir að heildarávinningur ákærðu af brotum sínum hafi að minnsta kosti numið 656 milljónum króna. Það þýðir að heildarávinningur hvers og eins hafi numið minnst 164 milljónum. Fyrirliggjandi sakargögn sýni að hinir ákærðu hafi að minnsta kosti gert ráðstafanir til þess að láta ávinninginn renna til aflandsfélags- eða félaga í endanlegri eigu og undir raunverulegri stjórn þeirra. Þeir hafi meðal annars stofnað aflandsfélag á Kýpur í þessu skyni.

Ákærðu hafi engu að síður hafi fengið verulegar fjárhæðir greiddar á reikninga sína á Íslandi á verknaðartímabilinu. Markús hafi fengið tæpar 54 milljónir, Ólafur tæpar 11 milljónir, Karl tæpar 46 milljónir og Gísli rúmar 35 milljónir.

Það er á grundvelli þessara upphæða sem sérstakur saksóknari hefur kyrrsett eigur sem skráðar eru á hina ákærðu og krefst þess jafnframt að umræddar eignir verði gerðar upptækar með dómi. Í tilfelli Markúsar er þar meðal annars um að ræða helmingseignarhlut í fasteign að Skerplugötu í Reykjavík, hlutabréf í Högum og Icelandair Group, ríkisskuldabréf og hlutdeildarskirteini í verðbréfasjóðum. Í tilfelli Karls er þar um að ræða helmingshlut í fasteign í Goðatúni í Reykjavík og 4,4 milljónir króna inni á bankareikningi hjá Íslandsbanka. Í tilfelli Gísla er þar um að ræða helmingseignarhlut í fasteign að Holtabyggð í Hrunamannahreppi. Eignir Ólafs voru ekki kyrrsettar né heldur krafist upptöku á þeim.