Segja ósamræmi tveggja ríkisstofnana um að kenna

Innflytjandi Kickup á Íslandi hefur sent frá sér tilkynningu vegna innköllunar Matvælastofnunar á vörunni sem fjallað var um á Vísi fyrr í dag.

Fréttastofu barst tilkynning frá Matvælastofnun í dag að búið væri að innkalla munnpúðana Kickup Real White og Kickup strong. Er varan skilgreind af Matvælastofnun sem matvæli og ástæða innköllunar sögð vera sú að hún inniheldur koffín.

Í tilkynningu sem Guðmundur Már Ketilsson og Heiðar Hallgrímsson senda frá sér fyrir hönd Kickup segir að þeir félagar ætlað að hefja innflutning á vörunni. Tollstjóri hafi sagt að flokka ætti vöruna sem fæðubótarefni. Í kjölfarið hafi þeir sett sig í samband við Matvælastofnun (MAST) sem hafi staðfest skilgreiningu Tollstjóra.

Þeir félagar voru skömmu síðar stöðvaðir í tollinum og sagt að greiða tóbaksgjald af vörunni þar sem um tóbakslíkjör væri að ræða. Í kjölfarið sóttu þeir um leyfi til innflutnings á tóbaki eða tóbakslíki. Þeir hafi svo farið fram á að lögin yrðu endurskoðuð. Þeim hafi verið breytt í desember 2012 á þann veg að ekki yrði að greiða tóbaksgjald af vöru sem ekki innihéldi tóbak eða nikótín. Hófu þeir svo innflutning á Kickup nú í janúar með bindandi áliti þess efnis að Kickup væri tóbakslíki en ekki fæðubótarefni.

„Hvað hefði það þýtt ef þessum lögum hefði ekki verið breytt og ÁTVR séð um sölu eins og um venjulega tóbaksvöru væri að ræða? Hefði MAST getað farið fram á það við ÁTVR að stöðva dreifingu á vörunni þó svo að um tóbak sé að ræða?" segir í tilkynningunni.

Þeir félagar segjast hafa takmarkað sölu á efninu við 16 ára aldur og hafi ætlað að leggja til takmörkun fyrir 18 ára og yngri. Það sé þó erfitt á meðan varan sé flokkuð sem matvæli.

Tilkynninguna frá Kickup má lesa í heild sinni hér fyrir neðan.