Annað óvænt tap hjá Emsdetten

Ólafur Bjarki Ragnarsson skoraði sex mörk fyrir Emsdetten sem tapaði afar óvænt fyrir Eintracht Hildesheim í þýsku B-deildinni í handbolta í kvöld, 31-23.

Staðan í hálfleik var 19-12, Hildesheim í vil og var sigur liðsins aldrei í hættu í kvöld. Ernir Hrafn Arnarsson skoraði þrjú mörk fyrir Emsdetten í leiknum, þar af eitt af vítalínunni.

Þetta var reyndar annað óvænta tap Emsdetten í röð því fyrir nokkrum dögum síðan tapaði liðið fyrir botnliði Ferndorf, 28-27.

Emsdetten er þó enn með sex stiga á forystu á toppi deildarinnar en næstu lið á eftir, Bergischer og Eisenach, unnu bæði leiki sína í kvöld. Bæði lið eru með 30 stig.

Eisenach vann Erlangen, 22-17, og skoraði Hannes Jón Jónsson fimm mörk fyrir fyrrnefnda liðið. Aðalsteinn Eyjólfsson er þjálfari Eisenach.

Þá hafði Bergischer betur gegn Hamm-Westfalen, 33-30. Arnór Atlason skoraði tvö mörk fyrir Bergischer í kvöld.

Þá vann Aue, lið Rúnars Sigtryggssonar, góðan sigur á Henstedt-Ulzburg, 30-18. Sveinbjörn Pétursson markvörður spilar með Aue sem er í tólfta sæti deildarinnar með 20 stig.