Ólafía vill verða formaður VR

„Það er rétt - ég var að skila inn framboði í morgun og nú er ég bara komin á fullt í undirbúning," segir Ólafía Rafnsdóttir, sem hefur ákveðið að bjóða sig fram sem formaður VR í komandi formannskjöri. Kosið verður um nýjan formann í VR rafrænt þann 7. til 15. mars næstkomandi.

Ólafía segist hafa brennandi áhuga á kjaramálum og þjófélagsmálum, og á þeim forsendum hafi hún ákveðið að bjóða sig fram. „Starfsferill minn hófst í VR fyrir 24 árum síðan, ég starfaði þar í 7 ár. Ég hef mikinn áhuga kjaramálum, enda sýnir starfsreynsla mín og menntun það."

Ólafía segir að hluti stjórnar VR, þar á meðal varaformaðurinn, styðji sig. „Það var komið að máli við mig í desember, þar af hluti stjórnar VR og varaformaðurinn sem bað mig að velta þessu fyrir mér - hvort ég hefði áhuga á þessu. Ég er búin að velta vöngum yfir þessu í allan þennan tíma og skilaði inn framboðinu mínu í morgun."

Hún er alveg tilbúin að taka slaginn við núverandi formann, Stefán Einar Stefánsson. „Ég þekki núverandi formann ekki neitt, en mér finnst mikilvægt að fólk hafi val. Hann er búinn að gera marga góða hluti fyrir félagið en ég tel mig geta betur. Það er mikilvægt að hafa gott bakland, og á meðan ég var að ákveða þetta og svara þessari spurningu, þá kannaði ég víða meðal manna hvort áhugi væri fyrir nýju framboði. Miðað við þær niðurstöður tel ég að það sé eftirspurn eftir því að fá nýjan formann - ég vil allavega að fólk hafi val um það."

Ólafía segir að von sé á fréttatilkynningu frá sér síðar í dag.

Lesa má nánar um framboð til formanns VR á vefsíðu þeirra.