Sáralitlar breytingar á launamun kynjanna undanfarin ár

Karlmenn eru að meðaltali með ríflega 80 þúsund krónum meira í laun en konur. Þetta kemur fram í nýrri könnun Hagstofunnar sem birt var í dag. Þar kemur einnig fram að kvenstjórnendur eru með um 220 þúsund krónur lægri laun en karlar í stjórnunarstöðum. Sáralitlar breytingar hafa orðið á launamun kynjanna undanfarin ár.

Laun tæplega 30 þúsund manns á almennum vinnumarkaði fyrir árið 2012 voru til skoðunar hjá Hagstofunni. Um er að ræða regluleg laun sem eru fyrir umsaminn vinnutíma á mánuði en ná ekki til yfirvinnu né frammistöðutengdra greiðslna.

Ef við rýnum í tölurnar sem birtar voru í dag kemur í ljós að í öllum starfsstéttum eru konur með lægri laun en karlar. Hjá verkafólki munar að jafnaði 49 þúsund krónum á launum karla og kvenna, munurinn: 14,6%.

Á meðal iðnaðarmanna er munurinn 36 þúsund krónur eða 10 prósent. Munurinn fer aftur upp þegar við skoðum laun afgreiðslufólks. Munurinn þar á launum kynjanna er 20,6 prósent.

Og áfram höldum við. Hjá skrifstofufólki er munurinn 17,2 prósent. Hjá sérfræðingum er munurinn í krónum talið 95 þúsund krónur tæplega 16 prósent. Mestur er munurinn á meðal stjórnenda sem jafnframt er launahæsti flokkurinn eða 27,2 prósent.

Sé allt tekið saman er launamunur kynjanna, 22,6 prósent sem er svipað og undanfarin ár en töluverð aukning frá 2009 þegar munurinn var 17,7 prósent.

Margrét Sanders, framkvæmdarstjóri Deloitte á Íslandi hefur lengi látið til sín taka í baráttunni fyrir bættum hlut kvenna á vinnumarkaðnum.

„Mér finnst þetta sorgleg könnun. Erum við enn einu sinni, árið 2013, að ræða launamun kynjanna? Við hjá Deloitte tókum þá ákvörðun að útrýma launamun kynjanna - það var gert á einni nóttu árið 1999,“ segir hún.

Margrét er orðin þreytt á síendurteknum fréttum af sama málinu.