Efnilegir skákmenn í ráðhúsinu

„Skák er góð fyrir heilann,“ sagði ungur skákmaður sem sótti Jólapakkaskákmót í Ráðhúsi Reykjavíkur í dag. Um 130 börn tóku þátt mótinu sem er eitt fjölmennasta barnaskákmót sem haldið er á ári hverju.

Einbeitingin skein úr andlitum margra þeirra barna sem saman voru komin á Jólapakkaskákmóti sem taflfélagið GM Hellir stóð fyrir í ráðhúsi Reykjavíkur í dag. Mótið hefur verið haldið frá árinu 1996 og fer fram í 16. sinn í ár. Margir voru að taka þátt í sínu fyrsta skákmóti meðan aðrir voru þrautreyndir við taflborðið þrátt fyrir ungan aldur.

Fréttastofa Stöðvar 2 leit við í ráðhúsinu í dag og tók nokkra efnilega skákmenn tali líkt og sjá má í myndbandinu hér að ofan.