„Ég mun draga þig fyrir rétt“ - Keflavík Music Festival fer í hart

Pálmi Þór Erlingsson, einn skipuleggjenda tónlistarhátíðarinnar Keflavík Music Festival sem fram fór um helgina, segist ætla að kæra tónlistarmanninn Franz Gunnarsson fyrir meiðyrði.

Fjölmargir listamenn hættu við tónleika sína á hátíðinni og gáfu upp ýmsar ástæður fyrir því. Hljómsveitin Ensími var meðal þeirra, en Franz er meðlimur sveitarinnar. Skipuleggjendur voru sakaðir um samningsbrot og illa gekk að ná tali af þeim yfir hátíðina sjálfa.

„Ég mun draga þig fyrir rétt og láta þig standa við stóru orðin,“ skrifar Pálmi við bloggfærslu Franz um hátíðina, og segist hafa fengið af því fregnir að Franz hafi hringt í listamenn sem áttu að koma fram á hátíðinni til þess að fá þá til að afboða.

„Ég held að menn ættu að reyna að líta í eigin barm frekar en að benda á alla aðra sem gagnrýna hátíðina réttilega,“ segir Franz í samtali við Vísi, og vísar því alfarið á bug að hann hafi þrýst á listamenn að hætta við.

„Þetta er algjör þvættingur. Og það væri nú eiginlega bara flott ef maður væri í réttarsal og hvert og eitt af þessum böndum, og þau útlendu þá líka, myndu vitna til um það. Ég hringdi ekki í eina manneskju til þess að hvetja til að hætta við að að spila, enda kemur það mér ekkert við hvað önnur bönd gera.“

Franz segir fjölmarga listamenn hafa útskýrt fjarveru sína á sínum heimasíðum og segir hvern sem er geta haft samband við þá og spurt hvort Franz hafi þrýst á þá.

„Mér finnst þetta nú bara frekar mikil meiðyrði á móti, að saka mig um að standa á bak við eitthvað samsæri um að leggja hátíðina þeirra á kné, þetta er bara bull.“

Ekki náðist í Pálma Þór Erlingsson við vinnslu fréttarinnar.