Engin framlög til vegaframkvæmda á höfuðborgarsvæðinu næsta áratuginn

Guðlaugur Þór Þórðarson þingmaður segir Reykjavík sitja á hakanum í vegaframkvæmdum en engu fé verði að óbreyttu varið að til vegaframkvæmda í höfuðborginni næstu tíu árin. Á sama tíma sé bruðlað með milljarð til almenningssamgagna í borginni með byggingu brúar við Geirsnef sem farið hafi langt fram úr kostnaðaráætlun.

Nýjasta samgöngumannvirkið í Reykjavík er tvær brýr við Geirsnef fyrir hjólandi og gangandi vegfarendur þar sem kílómetraverðið er rúmar 700 milljónir króna eða um 118 milljónum meira en fyrir hvern kílómetra við breikkun Reykjanesbrautar að mislægum gatnamótum meðtöldum. En kostnaður við lagningu brúarinnar fór um 22 prósent umfram kostnaðaráætlun. Guðlaugur Þór Þórðarson þingmaður Sjálfstæðisflokksins í Reykjavík segir þessa brúarsmíð endurspegla kolranga forgangsröðun í samgöngumálum borgarinnar.

En hvers vegna telur Guðlaugur Þór þetta vera ranga forgangsröðun?

„Það er mjög góð hugmynd að byggja hér brú. En hún er allt of dýr og við verðum nú sem aldrei fyrr að byggja með hagkvæmum hætti og 270 milljónir er einfaldlega allt of dýrt,“ segir hann.

Allt frá árinu 2007 til 2011 segir Guðlaugur Þór að framlög til nýframkvæmda og viðhalds í Reykjavík hafi verið 2,1 prósent af heildarframlögum til vegamála og árið 2011 aðeins eitt prósent

„Það var ekkert á síðasta ári og það sem allra verst er að það er búið að gera samning um það að setja ekkert í þetta næstu tíu árin“ segir Guðlaugur Þór.

Þetta sé samkvæmt samkomulagi sem fyrri ríkisstjórn gerði við sveitarfélögin á höfuðborgarsvæðinu á móti því að milljarður færi í að efla almenningssamgöngur og kostnaður við brýrnar við Geirsnef komi af því fé.

„Og nú er það svo að hér í Reykjavík gerast 43% af öllum alvarlegum umferðarslysum á Íslandi. Alvarleg umferðarslys kosta um 23 milljarða króna á ári á gömlu verðlagi. Það er langt síðan að við hefðum átt að átta okkur á því að við  verðum að forgangsraða  í þágu umferðaröryggis,“ segir Guðlaugur Þór.

Taka eigi út þá staði sem séu hættulegastir í umferðinni, mæla þá með vísindalegum hætti og forgangsraða vegaframkvæmdum eftir því. Það gefi augaleið að ekki sé hægt að setja ekkert fé í vegaframkvæmdir á höfuðborgarsvæðinu þar sem flest slysin verði.

Þú ætlast þá væntanlega til þess að ríkisstjórnin breyti þessu samkomulagi sem er enn í gildi?

„Það þarf tvo til. En aðalatriðið er að ég hef barist fyrir umferðaröryggi frá því ég byrjaði í stjórnmálum og ég mun halda því áfram  hvort sem ég er í stjórnarliðinu  eða í stjórnarandstöðu,“ segir Guðlaugur Þór Þórðarson.