Ég er alveg kreisí í knús

"Þetta líf er ein óvissuferð," segir hressa athafnakonan Andrea Róberts. Lífið náði tali af Andreu og spurði hana að ýmsum skemmtilegum spurningum.

Nafn?

Andrea Róbertsdóttir



Aldur?

38 minnir mig.



Starf?

Forstöðumaður og móðir.

Hvern faðmaðir þú síðast?

Ég knúsaði strákana mína síðast í morgun. Ég er alveg kreisí í knús.

En kysstir?

Strákana mína í morgun. Best í heimi.

Hver kom þér síðast á óvart og hvernig?

Þetta líf er ein óvissuferð. Life is what happens to you while you're busy making other plans.

Hvaða galla í eigin fari ertu búinn að umbera allt of lengi?

Allt á að gerast í gær. Getur samt verið kostur, fer eftir hvernig þetta er matreitt.

Ertu hörundsár?

Nei. Ein ástæða þess að ég elska að eldast.

Dansarðu þegar enginn sér til?

Játs, sjón er sögu ríkari skal ég segja þér. Tónlist, dans og hlátur eru algjört meðal.

Hvenær gerðirðu þig síðast að fífli og hvernig?

Það er mjög mikilvægt að æfa sig í þessu og ná árangri. Maður hættir ekki að leika sér af því maður verður gamall – maður verður gamall af því maður hættir að leika sér.

Hringirðu stundum í vælubílinn?

Já, og með stæl – maður verður að gangast við öllum tilfinningum sínum.

Tekurðu strætó? „Þetta er besti dagur lífs míns!“ kallaði Dreki, sonur minn, yfir allan strætóinn í sinni fyrstu strætóferð fyrir tveimur árum. Hef ekki farið síðan. Ætti að skella mér aftur.

Hvað eyðirðu miklum tíma á Facebook á dag?

Fer eftir skapi og dagsformi. Kannski 30-60 mínútum á sólarhring.

Ferðu hjá þér þegar þú hittir fræga eða heilsarðu þeim?

Ég verð aldrei „starstruck“ en það gerist eitthvað þegar ég hitti Vigdísi Finnbogadóttur.

Lumarðu á einhverju sem fáir vinir þínir vita um þig?

Eins og opin bók og kem til dyranna eins og ég er klædd en það er lítill leynistaður þarna.

Hvað ætlarðu alls ekki að gera um helgina?

Aldrei að segja aldrei því aldrei getur aldrei orðið aldrei. En fram undan er fyrsta brúðkaupslausa helgin í langan tíma. Þangað til annað kemur í ljós. Nú er Dreki, stóri strákurinn minn, að jafna sig af hlaupabólu og síðast en ekki síst verður Jaki, sem ég var að eignast um daginn, tveggja ára um helgina. Alls ekki að slæpast er kannski stutta svarið.