Skúlptúr Skúla í Wow lánaður á Höfðatorg

Setja á listaverk í eigu athafnamannsins Skúla Mogensen upp við Höfðatorg. Skúli lánar borginni verkið sem er eftir Rafael Barrios. Fulltrúi VG segir óþarft og óheppilegt að koma listaverkinu fyrir í almannarými nærri fyrirtæki eigandans.

Skipulagsráð Reykjavíkur hefur samþykkt að skúlptúrinn Obtusa eftir Rafael Barrios verði settur upp á mótum Höfðatúns og Borgartúns. Verkið er í eigu athafnamannsins Skúla Mogensen sem kostar uppsetninguna.

Fram kemur að í erindi Hafþórs Yngvasonar, safnstjóra Listasafns Reykjavíkur, til menningarráðs borgarinnar að níu skúlptúrar eftir Rafael Barrios hafi síðastliðinn vetur verið settir upp á Madison Avenue á Manhattan í New York. Sýningin hafi vakið „feikilega athygli og aðdáun almennings". Svo vilji til að eitt verkið sé í eigu íslensks listaverkasafnara – Skúla Mogensen. Barrios er Bandaríkjamaður en ólst upp í Venesúela.

Kveðst Hafþór hafa óskað eftir því við Skúla að fá verkið lánað svo sýna megi það öllum borgarbúum og hafi Skúli fallist á það. Staðsetningin á hringtorginu á mótum Borgartúns og Katrínartúns (áður Höfðatúns) gefi fólki kost á að ganga í kringum skúlptúrinn sem sé mjög mikilvægt. „Þegar horft er á hann úr einni átt virðist hann samanstanda af fjórum þrívíðum formum en þegar litið er á hann frá hlið sést að hann er minna en einn sentímetri að þykkt," útskýrir safnstjórinn.

Að sögn Hafþórs er Skúli mjög sáttur við staðsetninguna. Hann hafi boðist til að borga uppsetningu og lýsingu verksins með það í huga að það verði á þessum stað í nokkur ár. Borgin myndi hins vegar tryggja verkið. Það mun kosta rúmar eitt hundrað þúsund krónur á ári „Það eru eyjur í götunni sem verja skúlptúrinn ef ökumaður missir vald á farartæki," tekur safnstjórinn fram í því samhengi.

Torfi Hjartarson, fulltrúi Vinstri grænna í skipulagsráði, greiddi atkvæði gegn því að gerður yrði samningur við Skúla um uppsetningu Obtusa. Bókaði Torfi að hann teldi „bæði óþarft og óheppilegt að koma listaverki í eigu einkaaðila fyrir á áberandi stað í almannarými utan við skrifstofur borgarinnar og móttökuhúsið Höfða". Benti Torfi sérstaklega á að Skúli Mogensen ætti í „umsvifamiklum rekstri með áberandi merkingum skammt undan." Vísar hann til þess að Skúli er eigandi Wow-air sem er með skrifstofur rétt ofan Höfðatorgs.

Aðrir í skipulagsráði gerðu ekki athugasemdir við samninginn við Skúla sem fer aftur til menningarráðs og þaðan til afgreiðslu borgarráðs.