Stefán Jón vill nýjan R-lista

Stefán Jón Hafstein segir að nú sé stund upp runnin fyrir nýtt framboð – Regnbogaframboðið – í Reykjavíkurborg. Allar aðstæður séu fyrir hendi.

Björt framtíð mælist með svipað fylgi og Besti flokkurinn hlaut í síðustu kosningum, samkvæmt nýrri könnunFréttablaðsins.  Stefán Jón Hafstein, fyrrverandi borgarfulltrúi R-listans, telur augljóst að jarðvegur sé fyrir nýtt framboð í Reykjavík, Regnbogaframboðið.

Könnunin leiðir í ljós að hið pólitíska landslag í borgarpólitíkinni hefur lítt sem ekkert breyst þó Jón Gnarr borgarstjóri hafi tilkynnt að hann sé hættur. Fylgi Besta flokksins færist einfaldlega til Bjartrar framtíðar. Stefán Jón Hafstein, sem hefur skoðað könnunina í kjölinn, telur það þó ekki helstu tíðindi könnunarinnar.

„Mér finnst þetta merkileg könnun sem Fréttablaðið birtir í morgun. Aðalfréttin í henni er sú að meira en helmingur Reykvíkinga, eða um það bil, getur ekki gert upp hug sinn gagnvart neinum þeirra flokka sem eru í boði. Það segir okkur að nú og allir sjá, eftir að Jón Gnarr hættir, er gríðarlegt tómarúm í borgarstjórnarpólitíkinni í dag.“

Og hvað gerist þá í því andrúmi? Stefán Jón telur ljóst að nú muni menn rjúka upp til handa og fóta. „Sjálfstæðisflokkurinn er með sitt prófkjör en ég horfi til þess að félagshyggjuflokkarnir guldu afhroð í vor; Samfylking, Vinstri græn og Björt framtíð, eru með innan við 40 prósent á landsvísu eftir alþingiskosningarnar. Mín tillaga er sú að nú sameinist þeir um framboð sem við getum kallað Regnbogaframboðið. Og bjóði öðrum; Pírötum, Dögun, Lýðræðisvaktinni ... eða hverjum sem vill – almennum borgurum í Reykjavík sem fæstir eru í stjórnmálaflokki, að stíga fram og mynda breiðfylkingu um lýðræði, umhverfi, jafnrétti og betri borg. Þetta framboð getur auðveldlega fengið 55 til 60 prósent atkvæða og meirihluta í borginni.“

Er þetta ekki svipuð eða sama hugmynd og Reykjavíkurlistinn byggði á?

„Það vill svo til að fyrir um 20 árum þá tók ég þátt í því, ásamt mörgum öðrum, að mynda Reykjavíkurlista sem þá sigraði í borginni, og breytti borginni með því að sigra þar þrisvar sinnum í röð. Á sama tíma voru vinstri öflin sundruð á landsvísu og náðu aldrei neinu meðan íhald og framsókn sátu við völd í þrjú löng kjörtímabil. Mismunurinn er augljós, lærdómurinn er mikill og nú er stórt tækifæri sem bíður,“ segir Stefán Jón Hafstein.