Óttast að landsbyggðin fái ekki nauðsynlegar uppbætur

Prófessor í stjórnmálafræði óttast að landsbyggðin fái ekki nauðsynlegar uppbætur ef atkvæðavægi verður jafnað í landinu líkt og Stjórnlagaráð leggur til í frumvarpi að nýrri og endurskoðaðri stjórnarskrá.

Atkvæði kjósenda í dreifbýli hafa haft meira vægi í kosningum til Alþingis á Íslandi en þeirra sem búsettir eru í þéttbýliskjördæmum. Þjóðin fær á laugardag tækifæri til að segja sína skoðun á þessu kosningaskipulagi, það er hvort að hún vilji að í nýrri stjórnarskrá verði ákvæði um að atkvæði kjósenda alls staðar að af landinu vegi jafnt. Grétar Þór Eyþórsson, prófessor í stjórnmálafræði, segir stjórnlagaráð taka fram að aðstöðumunur sé á milli höfuðborgarsvæðisins og landsbyggðarinnar og að í kafla um sveitarfélög felist nauðsynlegar uppbætur til landsbyggðarinnar sem fást fyrir að missa atkvæðavægi.

„Ég á mjög erfitt með að sjá að það geti falist sérstaklega tryggar eða miklar uppbætur í því að sveitarfélög fái mögulega einhver aukin verkefni, mögulega eitthvað aukið sjálfstæði, sem stjórnlagaráð tekur sérstaklega fram að skuli vera þá í lögum. Með öðrum orðum er verið að leggja til að þetta jafnvægi verði bundið í stjórnarskrá en uppbæturnar sem eru viðurkennar verði hins vegar festar í lögum sem eru mjög auðbreytanleg eins og við vitum," segir Grétar Þór.

Grétar Þór segist halda að ákvæðið verði samþykkt í þjóðaratkvæðagreiðslunni á laugardaginn af meirihluta þjóðarinnar. „Ég er hins vegar að benda á að þetta mál er flóknara en það virðist vera," segir Grétar Þór Eyþórsson, prófessor í stjórnmálafræði, sem fjallar ítarlega um málið í erindi sínu á félagsvísindatorgi í Háskólanum á Akureyri nú í hádeginu.