Pakkaði tvisvar ofan í tösku því ég hafði ekkert betra að gera

Þeir Gary Martin og Mark Doninger bjuggu saman á Akranesi í um tvö ár. Bíllausir og nánast aðeins með félagsskap hvors annars. Það reyndist þeim ekki alltaf auðvelt.

„Annað árið var ekkert að gera hjá okkur nema fara heim eftir æfingar. Ég pakkaði tvisvar ofan í tösku bara að gamni mínu. Svona mikið leiddist mér," segir Martin og viðurkennir að þeir hafi verið orðnir hálfþunglyndir.

„Við töluðum ekki um annað en að fara heim til Englands og það var líka komið á það stig að við þoldum ekki hvorn annan og gátum vart talað saman á stundum," segir Martin en þeir eru samt fínir félagar í dag og tala saman nær daglega. Umgangurinn á milli er þó minni enda hafa þeir verið að kynnast mikið af nýju fólki.

„Það er mjög gaman í borginni og við erum þannig týpur að við þurfum að vera í kringum annað fólk. Einangrunin á ekki vel við okkur og það er ekkert leyndarmál að okkur líður betur og það sést líka á okkar leik og öllu fasi," segir Martin og Doninger tekur af honum orðið.

„Það er gaman að hanga með strákunum í Stjörnuliðinu. Fara í bíó, á kaffihús, golf eða spila póker. Það er allt í einu eitthvað að gera og ég kann við samheldnina í Stjörnuhópnum. Þar standa allir saman og hjálpa hvor öðrum. Það hefur verið vel tekið á móti mér. Það er auðveldara að spila betur og njóta leiksins þegar manni líður betur utan vallar eins og hjá mér núna."

Martin þarf ekki að spila aftur upp á Skaga í sumar en næsti leikur Stjörnunnar í deildinni er upp á Skaga.

„Ég hlakka til þess að spila þar aftur. Gaman að mæta gömlum félögum og vonandi verður tekið vel á móti mér. Ég gaf allt sem ég gat er ég spilaði með ÍA og það er að stórum hluta mér og Gary að þakka að liðið komst upp. Vonandi verða móttökurnar fínar."