Þeir sem misstu af veiðunum fá uppbót

Þeir sem töldu að strandveiðar á svæði A væru óheimilar í dag og réru ekki fá í staðinn viðbótardag til strandveiða í ágúst mánuði.

Strandveiðar á svæðinu áttu að stöðvast í dag en vegna tæknilegra mistaka birtist auglýsing þar að lútandi ekki í Stjórnartíðindum með þeim afleiðingum að veiðarnar voru áfram heimilar. Einhverjir áttuðu sig á því og sigldu en aðrir sátu grandlausir heima.

Ný auglýsing hefur verið birt þess efnis að strandveiðarnar verði óheimilar frá og með morgundeginum. Þeir sem héldu til sjós í dag fá að ljúka 14 tíma veiðiferð. Þeir sem misstu af deginum fá aftur á móti aukadag í ágúst. Skilyrði þess eru að viðkomandi hafi verið á strandveiðum í júlí en ekki róið í dag.

Með þessu er komið til móts við sjómenn og líklega komið í veg fyrir allar mögulegar skaðabótakröfur vegna mistakanna.