Formúlubílar, börn og dýr á frímerkin

fólkEf marka má númerastandinn í pósthúsinu í Austurstræti eru frímerkjasafnarar burðarás í starfsemi Íslandspósts. Þar eru tveir valkostir í boði þegar númer er tekið fyrir þjónustu; almenn þjónusta og frímerkjasafnarar.

Vilhjálmur Sigurðsson, forstöðumaður frímerkjasölu hjá Íslandspósti, segir að mest úrval sé fyrir frímerkjasafnara í Austurstræti, enda margir ferðamenn þar á ferð. Frímerkjasöfnurum fari hins vegar fækkandi.

„Því miður er lítið um endurnýjun í þessu hobbýi, enda hefur unga kynslóðin önnur áhugamál eins og tölvur og tölvuleiki,“ segir Vilhjálmur. Þá sé miklu minna af pósti með frímerkjum í umferð og fyrirtæki farin að vélstimpla umslög. „Fyrst og síðast söfnuðu menn þessu af því að þetta var á öllum umslögum áður fyrr.“

Íslandspóstur rekur þó enn sérstaka frímerkjadeild. Frímerkjasalan varð til 1930 og þar starfa tíu manns við að gefa út frímerki og selja til safnara í yfir 85 löndum. Íslensk frímerki eru sérstaklega vinsæl í Þýskalandi. Reynt hefur verið að blása lífi í áhuga á frímerkjum með Merkilega klúbbnum, en í honum eru nú á bilinu 600 til 700 börn.

„Við gefum út upplýsingablað í 13 þúsund eintökum, þannig að það er enn áhugi fyrir þessu. Það fer þó sennilega að síga á seinnihlutann hvað þessa uppfinningu frá 1840, sem frímerkið er, varðar.“

kolbeinn@frettabladid.is