Stjórnarskrártillaga verður rædd á Alþingi á þriðjudag

Frumvarp um breytingar á stjórnarskrá var afgreidd úr nefnd í gær og verður til umræðu á þriðjudag. Stefnt að því að breytingar náist fyrir þinglok. Stjórnarandstaðan vill mat á áhrifum fyrir umræðurnar.

Stjórnskipunar- og eftirlitsnefnd afgreiddi frumvarp um breytta stjórnarskrá í gær. Málið verður tekið til umræðu á þriðjudag.

Meirihlutinn leggur nú drög að því að senda frumvarpið til Feneyjanefndarinnar, þar sem það verði metið heildstætt. „Ég er að leggja drög að því í smáatriðum. Ég veit að þeir geta tekið við þessu, en smáatriðin eru ekki alveg ljós. Þeir geta tekið við þessu og gert þetta innan þeirra tímamarka sem við þurfum,“ segir Valgerður Bjarnadóttir, formaður stjórnskipunar- og eftirlitsnefndar.

Ólöf Nordal, fulltrúi Sjálfstæðisflokksins í nefndinni, segir óeðlilegt að málið fari í umræður á Alþingi áður en heildstætt mat hafi farið fram á áhrifum breytinga á stjórnarskrá. Sérfræðingahópur hafi bent á að slíkt mat vantaði.

„Hér er um að ræða frumvarp sem kemur annars staðar frá og mér finnst eðlilegt að meirihlutinn láti þetta mat fara fram áður en hann leggur frumvarpið fram.“

Ólöf segir mikla vinnu eftir við málið, einnig eigi eftir að fara yfir þær athugasemdir sem aðrir sérfræðingar hafa gert.

„Við verðum bara að vinna þetta mál. Menn verða bara að gefa sér tíma í það og við munum auðvitað kalla eftir því að það verði gert og þá inni í nefndinni,“ segir Ólöf.

Valgerður er enn sannfærð um að unnt sé að ljúka málinu fyrir vorið, þó mikil vinnasé eftir.

„Við þurfum að fá málið aftur inn í nefndina þannig að við getum hafist handa við að senda þetta inn í ráðuneytin hér til að athuga hvort þurfi einhver bráðabirgðaákvæði, svo eitthvað sé nefnt. Þá vinnu þarf að vinna og svo er hægt að hefja þá efnislegu umræðu sem menn hafa beðið eftir um leið og málið kemur aftur fyrir nefndina,“ segir Valgerður.

„Þú getur líka verið með heildstætt mat og það getur tekið fimm ár og þá gerist aldrei neitt, af því að þú ert alltaf að meta eitthvað. Það virðist nú vera það sem íhaldsmennirnir, hvar í flokki sem þeir standa, eru í núna.“ kolbeinn@frettabladid.is