Leita álits Feneyjanefndar

Ráðgjafanefnd Evrópuráðsins verður beðin að rýna í stjórnarskrárfrumvarp. Gefur það heildstæða mat sem fólk kallar eftir, segir nefndarformaður. Stjórnarandstaðan vill slíkt mat áður en málið fer til umræðu.

Meirihluti stjórnskipunar- og eftirlitsnefndar vinnur nú að því að fá álit Feneyjanefndarinnar á frumvarpi um nýja stjórnarskrá. Feneyjanefndin er ráðgefandi fyrir Evrópuráðið í stjórnarskrármálum.

Valgerður Bjarnadóttir, formaður nefndarinnar, segir að verið sé að leggja drög að erindi til Feneyjanefndar, sem geti tekið við málinu.

„Þá fáum við þetta heildstæða mat sem fólk er að kalla eftir. Hvaða áhrif þetta hefur á stofnanir landsins og svo framvegis. Það þarf til dæmis að skoða kosningakerfið og þeir eru með sérfræðinga í því líka.“

Sérfræðinganefnd sem skoðaði lagatæknilegar hliðar frumvarps um nýja stjórnarskrá benti á að ekki hefði farið fram heildstætt og skipulegt mat á áhrifum stjórnarskrártillagnanna í heild.

Ólöf Nordal, fulltrúi Sjálfstæðisflokksins í nefndinni, segir ótækt að sú vinna hafi ekki farið fram áður en málið kemur til umræðu á Alþingi. „Það er miklu betra og eðlilegra að svoleiðis sé gert áður en frumvarpið er lagt fram.“

Valgerður segir að Feneyjanefndin geti tekið við málinu og unnið matið innan þeirra tímamarka sem með þarf. - kóp