Eignaspjöll oftast unnin um helgar

Skráð brot á hegningarlögum voru töluvert fleiri í júlí síðastliðnum en síðustu ár, að því er fram kemur í nýútkomnum Afbrotatíðindum ríkislögreglustjóra.

Þar kemur fram að í júlí hafi verið skráð 965 brot á hegningarlögum, en það eru tæplega 200 fleiri en í sama mánuði í fyrra og rúmlega 250 fleiri en í júlí 2010.

Þá kemur fram að fyrstu sjö mánuði ársins hafi þjófnaðarbrot og innbrot verið færri en tvö síðustu ár. „Fíkniefnabrot og brot vegna ölvunaraksturs voru hins vegar fleiri frá janúar til júlí þetta árið en síðustu tvö árin,“ segir í Afbrotatíðindum.

Vakin er á því athygli í Afbrotatíðindum ríkislögreglustjóra að árið 2011 hafi um fjörutíu prósent eignaspjalla átt sér stað um helgar, en stór hluti þeirra hafi verið framin að nóttu til. „Flestar tilkynningar til lögreglu um nytjastuld áttu sér hins vegar stað á föstudögum og laugardögum árið 2011, eða um þriðjungur þeirra, flest undir morgun (milli 6 og 12 á hádegi).“

Sömuleiðis kemur fram að 98 prósent skemmdarverka sem tilkynnt voru til lögreglu árið 2011 hafi verið minniháttar, en til slíkra mála teljast bæði rúðubrot og veggjakrot. - óká