Deila um flík leiddi til hópslagsmála

Ungur maður er mjög lemstraður, skorinn og marinn í andliti eftir að hafa í tvígang orðið fyrir árás hóps manna aðfaranótt sunnudags. Árásarmennirnir, sem í fyrra skiptið voru þrír en hafði fjölgað um einn í það seinna, voru allir handteknir og yfirheyrðir.

Ástæða barsmíðanna, að sögn Jóhannesar Jenssonar, yfirmanns rannsóknardeildar lögreglunnar á Suðurnesjum, var sú að einn fjórmenninganna taldi að sá sem fyrir ofbeldinu varð væri klæddur í peysu eða jakka í sinni eigu.

Ekki liggur fyrir hvort það átti við rök að styðjast en hann fann sig alltént knúinn til að hefna þess og freista þess að endurheimta flíkina. Við það fékk hann aðstoð félaga sinna, en í seinna skiptið þurftu þeir einnig að halda aftur af vinafólki fórnarlambsins, sem reyndi að koma því til hjálpar. Alls tóku sjö þátt í slagsmálunum þegar mest lét. Málið er enn í rannsókn.

Á svipuðum tíma braust hálfþrítugur maður inn í íbúðarhús í bænum og gekk í skrokk á húsráðanda sem hafði vaknað við ólætin þegar húsbrjóturinn mölvaði rúðuna í útidyrunum. Svo virðist sem hann hafi ætlað að gera upp sakir við mann sem reyndist alls ekki vera á staðnum. - sh