Sala án áfengisgjalds ekki upplýst af ÁTVR

ÁTVR neitar að upplýsa um sölu á áfengi á kostnaðarverði til ríkisstofnana. Aðeins menntamálaráðuneytið og forsetaembættið hafa svarað Fréttablaðinu um innkaupin frá því fyrirspurn var send viðkomandi aðilum um miðjan júlí.

Áfengis- og tóbaksverslun ríkisins telur sér óheimilt að veita upplýsingar um sölu fyrirtækisins á áfengi án áfengisgjalds.

Þann 10. júlí síðastliðinn óskaði Fréttablaðið eftir því við ÁTVR að fá upplýsingar um heildarsölu fyrirtækisins samkvæmt reglum um aðila sem rétt hafa á því að kaupa áfengi á kostnaðarverði. Spurt var um tímabilið 2005 til 2012 og beðið um sundurliðun eftir hverjum og einum sem heyrir undir reglurnar.

„ÁTVR telur að það sé óheimilt að veita upplýsingar sem snerta viðskiptavini. Jafnframt er það skoðun ÁTVR að upplýsingalögin taki ekki til svona tilvika enda taki þau til málefna viðkomandi stofnunar en ekki þriðja aðila,“ segir í svari sem barst 16. júlí frá Sigrúnu Ósk Sigurðardóttur, aðstoðarforstjóra ÁTVR.

Nánar um málið segir í svari ÁTVR að þótt starfsemi fyrirtækisins sé í stórum þáttum stjórnsýslulegs eðlis sé fyrirtækið engu að síður einkaaðili í skilningi upplýsingalaga.

„Lögin taka aðeins til starfsemi einkaaðila að því leyti sem þeim hefur verið falið opinbert vald til þess að taka ákvarðanir um rétt eða skyldu manna,“ segir ÁTVR sem kveður sölu áfengis, hvort sem hún sé til einkaaðila eða opinberra aðila eins og ráðuneyta, ekki falla í þennan flokk. „Salan er hluti af þjónustustarfsemi ÁTVR sem er afdráttarlaust undanþegin skyldu til afhendingar upplýsinga. Fyrirspurnin fellur þannig utan gildissviðs laganna og er því hafnað.“

Í framhaldi af svari ÁTVR óskaði Fréttablaðið þann 17. júlí eftir upplýsingum um áfengisinnkaup beint frá þeim aðilum sem falla undir áðurgreindar reglur samkvæmt ákvörðun ríkisstjórnarinnar. Þetta eru embætti forseta Íslands, Alþingi, ráðuneyti, embætti biskups Íslands auk sjálfs fyrirtækisins ÁTVR. Aðeins hafa borist upplýsingar frá forsetaembættinu, sem svaraði 23. júlí og mennta- og menningarmálaráðuneytinu sem svaraði 13. ágúst. Aðrir ýmist hafa ekki svarað eða vísa til tímaskorts vegna sumarleyfa.

Meðal þess sem kemur fram í svörunum er að forsetaembættið keypti áfengi á kostnaðarverði fyrir 1.858.916 krónur árið 2008 og fyrir 1.887.410 krónur á árinu 2011. Sömu tölur fyrir menntamálaráðuneytið eru 1.063.460 krónur árið 2008 og 797.494 krónur í fyrra.

gar@frettabladid.is