Umfangsmiklar framkvæmdir

Verði af framkvæmdum mun verða lagður 2,7 kílómetra vegur frá skíðasvæðinu í Bláfjöllum að Þríhnúkum. Þar verður komið fyrir bílastæði og 1.500 fermetra þjónustubyggingu neðanjarðar. Frá henni verða 300 metra löng jarðgöng boruð inn að gíghvelfingunni. Við enda hennar verður komið fyrir útsýnissvölum þar sem hægt er að virða hvelfinguna fyrir sér. Þá er gert ráð fyrir þeim valkosti að hringstigi liggi frá svölunum að botni gígsins. Rétt er að ítreka að öll framkvæmdin er enn á hugmyndastigi.

Björn Ólafsson segir að ef af framkvæmdinni verður muni uppbyggingin verða í áföngum. Ekki verði reist 1.500 fermetra hús í upphafi, heldur sé það sú stærð sem farið verði í á endanum, ef allt gangi vel. „Það er eðli þessarar vinnu að leggja fram áætlanir miðað við það sem mest getur orðið.“