Ríkissjóður endurgreiðir hluta AGS-lána

Ríkissjóður og Seðlabanki Íslands greiða í byrjun þessarar viku samtals 171 milljarð króna fyrir fram af erlendum lánum sínum. Er um að ræða lán frá Alþjóðagjaldeyrissjóðnum (AGS) og Norðurlöndunum sem veitt voru í tengslum við efnahagsáætlun stjórnvalda og AGS sem lauk á síðasta ári.

Alls verður jafnvirði 62 milljarða króna greitt til AGS og jafnvirði um 109 milljarða króna til Norðurlandanna. Ná þessar fyrirframgreiðslur til gjalddaga sem falla á árunum 2013 og 2014 í tilfelli AGS-lánanna og á árunum 2016 til 2018 í tilfelli lánanna frá Norðurlöndunum.

Að þessum fyrirframgreiðslum loknum verður búið að greiða til baka 53% af upphaflegri lánsfjárhæð frá AGS og 59% af upphaflegri lánafyrirgreiðslu Norðurlandanna.

Í yfirlýsingu frá fjármálaráðuneytinu kemur fram að ákvörðunin um fyrirframgreiðslur komi í framhaldi af 125 milljarða króna skuldabréfaútgáfu ríkissjóðs á alþjóðlegum fjármálamörkuðum í maí. Sú aðgerð undirstriki aðgang Íslands að erlendum lánsfjármörkuðum og veiti svigrúm til að endurgreiða lán sem veitt eru til skemmri tíma. Þá hafi ákvörðunin verið tekin með hliðsjón af tiltölulega rúmri lausafjárstöðu ríkissjóðs og Seðlabankans í erlendri mynt næstu misseri.- mþl