Æfa viðbrögð við slysi á sjó

Almannavarnanefnd Þingeyinga og embætti Lögreglustjórans á Húsavík standa í dag, laugardag, fyrir sjóslysaæfingu á Skjálfanda og á Húsavík. Um samstarf við almannavarnadeild ríkislögreglustjóra og Landhelgisgæsluna er að ræða.

Æfð verða viðbrögð við bruna um borð í hvalaskoðunarskipi og markmið æfingarinnar eru einkum að prófa nýja viðbragðsáætlun.

Fjarskiptamál verða könnuð sérstaklega ásamt flæði þolenda frá slysstað á sjúkrahús. Eins hvort viðbragðsaðilar í umdæmi lögreglunnar á Húsavík hafi nægar bjargir til að takast á við hópslys á sjó. - shá