Landsbyggðin tapar konum

Konur eru alls staðar á landsbyggðinni færri en karlar, en þær hafa í meira mæli flutt burt á síðustu árum. Þetta kemur fram í nýrri rannsókn sem gerð var fyrir Byggðastofnun.

Ástandið er einna verst á Austurlandi þar sem 89 konur eru á hverja 100 karla. Á Suðurnesjum, Vesturlandi og Suðurlandi eru um 94 konur á hverja 100 karla. Höfuðborgarsvæðið er það eina þar sem konur eru fleiri en karlar, eða 101 á hverja 100 karla.

Ef aldurshópurinn 20 til 39 ára er skoðaður kemur fram enn meiri kynjamunur í sumum landshlutum, sem staðfestir að sögn skýrsluhöfundar að ungar konur hafi flust í meira mæli burt en ungir karlar.

Þannig eru aðeins 86 konur á þessum aldri á Austurlandi fyrir hverja 100 karla. Á Vestfjörðum er hlutfallið svo að 89 ungar konur búa þar á hverja 100 unga karla. Ungar konur heilt yfir landið eru færri en ungir karlar, eða 96 konur fyrir hverja 100 karla.

Konum í þessum aldurshópi hefur á undanförnum tíu árum fækkað í öllum landshlutum nema á Norðurlandi vestra. „Þrátt fyrir eða kannski ætti frekar að segja vegna mikillar uppbyggingar í kringum álversframkvæmdir á Austurlandi hefur munurinn aukist mest þar. Árið 2001 voru 94 konur á hverja 100 karla í þessum aldurshópi,“ segir í skýrslunni.

Ástæður þess að konur hafa flutt í meiri mæli af landsbyggðinni en karlar eru sagðar flókin blanda af einstaklings- og skipulagsbundnum þáttum, tog- og ýtikröftum. „Hvaða leiðir sem farnar verða er þó ljóst að grípa verður til einhverra aðgerða … Ef allar konur á barneignaraldri flytja úr byggðarlaginu verður engin náttúruleg fjölgun og byggðarlögin hrynja saman innan frá.“ - þeb