Annþór og Börkur harðneita allri sök

Tveir kunnir ofbeldismenn og refsifangar á Litla-Hrauni neita því alfarið að bera ábyrgð á dauða samfanga síns. Dómari kveður upp úr með gæsluvarðhald í dag. Fangelsisstjóri á Litla-Hrauni segir erfitt að taka á hættulegum föngum.

Annþór Kristján Karlsson og Börkur Birgisson, sem grunaðir eru um að hafa valdið dauða samfanga síns á Litla-Hrauni, neita því alfarið að hafa beitt manninn ofbeldi í klefa sínum í síðustu viku. Við yfirheyrslur í gær fullyrtu þeir báðir að þeir hefðu farið inn í klefann til að liðsinna manninum, sem hefði verið veiklulegur og liðið illa.

Sigurður Hólm Sigurðsson lést á fimmtudag eftir stutta veru í fangelsinu. Þangað hafði hann komið í gæsluvarðhald vegna ítrekaðra smáglæpa. Í fyrstu þótti ekkert gefa til kynna að honum hefði verið unnið mein en niðurstöður krufningar benda hins vegar til þess að innvortis áverkar séu afleiðing barsmíða.

Myndbandsupptökur sýna Annþór og Börk fara inn í klefa til Sigurðar skömmu áður en hann kallaði til fangaverði og var þá í andnauð. Þegar það varð ljóst í fyrradag var þeim stungið í einangrun.

Í gær voru tvímenningarnir svo leiddir fyrir dómara á Selfossi og farið fram á gæsluvarðhald yfir þeim svo að hægt yrði að halda þeim í einangrun á meðan á rannsókn málsins stendur. Dómari tók sér frest til dagsins í dag til að kveða upp úrskurð.

Annþór og Börkur eiga sér báðir mikla brotasögu. Þeir hafa undanfarnar vikur afplánað eftirstöðvar gamalla, þungra fangelsisdóma sem þeir hlutu fyrir manndrápstilraun annars vegar og fíkniefnainnflutning hins vegar. Áður höfðu þeir setið í gæsluvarðhaldi í nokkrar vikur vegna rannsóknar á skipulagðri glæpastarfsemi og þremur hrottafengnum líkamsárásum.

Margrét Frímannsdóttir, forstöðumaður á Litla-Hrauni, segir að starfsmenn fangelsisins hafi brugðist hárrétt við málinu á fimmtudaginn var.

Hún segir að alltaf ef grunur vaknar um að fangar óttist samfanga sína eða séu hræddir um að verða fyrir einhverju áreiti af hálfu samfanga sé brugðist við með því að reyna að flytja menn á milli deilda, en vegna þrengsla séu úrræðin mjög takmörkuð.

Spurð hvort tekið yrði öðruvísi á Annþóri og Berki innan veggja fangelsisins verði þeir fundnir sekir um að bera ábyrgð á andláti samfanga síns svarar hún:

„Það er auðvitað alltaf reynt að vista menn miðað við þeirra sögu. Við höfum haft hér þrjá klefa á því sem á að vera öryggisgangur, þar sem eru vistaðir einstaklingar sem eru hættulegir sjálfum sér eða öðrum. Hingað til hefur hann hins vegar verið nýttur undir almenna fanga vegna plássleysis. En það er bara eitthvað sem þyrfti að horfa sérstaklega á ef þetta reynist rétt – þetta hefur aldrei gerst hér áður.“

stigur@frettabladid.is