Fjármálaeftirlitið vill slíta starfsemi Sögu

Fjármálaeftirlitið (FME) hefur höfðað mál á hendur Sögu Capital til að reyna að slíta félaginu. Málið var tekið fyrir í Héraðsdómi Norðurlands eystra síðastliðinn fimmtudag. Samkvæmt upplýsingum frá FME tengist málshöfðunin ákvörðun þess að afturkalla starfsleyfi Sögu en Héraðsdómur Reykjavíkur staðfesti þá ákvörðun 5. mars síðastliðinn. Hersir Sigurgeirsson, forstjóri Sögu, segir að þeirri niðurstöðu hafi verið áfrýjað til Hæstaréttar. Hann telur kröfu FME um að setja félagið í slitameðferð vera eins og að framfylgja dauðadómi á meðan hann er enn í áfrýjun.

Saga Capital tapaði 1,8 milljörðum króna á árinu 2010 og samtals 8,3 milljörðum króna á árunum 2008-2010. Tekjur bankans á árinu 2010, 382 milljónir króna, drógust saman um 250% og nægðu ekki fyrir launum starfsmanna, hvað þá öðrum rekstrarkostnaði. Á sama tíma fjölgaði starfsmönnum Sögu úr 32 í 37 og bankinn flutti starfsstöð sína í Turninn við Höfðatorg.

Þorvaldur Lúðvík Sigurjónsson, fyrrverandi forstjóri Sögu, sagði upp starfi sínu í febrúar í fyrra og var Hersir ráðinn í hans stað. Í kjölfarið var ráðist í víðfeðmar aðgerðir til að skera starfsemi Sögu niður. Starfsmönnum var fækkað hratt á fyrstu mánuðum ársins og í lok ágúst var fyrirtækjaráðgjöf Sögu seld til MP banka og þorri annarra starfsmanna Sögu fékk uppsagnarbréf. Eftir þessar breytingar voru einungis tveir starfsmenn eftir hjá Sögu.

FME afturkallaði starfsleyfi Sögu sem fjárfestingabanka í október 2011 þar sem hann fullnægði ekki ákvæðum laga um fjármálafyrirtæki um eigið fé. Í kjölfarið var nafni hans breytt úr Sögu Fjárfestingabanka aftur í Sögu Capital. Félagið mátti enn fremur ekki lengur kalla sig banka.

Forsvarsmenn Sögu vildu að sú ákvörðun yrði ógilt og höfðuðu mál fyrir Héraðsdómi Reykjavíkur. Kröfu fyrirtækisins var hafnað í byrjun mars og hefur Saga áfrýjað þeirri niðurstöðu til Hæstaréttar. FME hefur samt sem áður höfðað mál á hendur Sögu og vill slíta starfsemi fyrirtækisins. Að sögn Hersis hefur áfrýjun Sögu í ógildingarmálinu fengið flýtimeðferð fyrir Hæstarétti og er búist við niðurstöðu í lok maí. Hann segir það þó ekki breyta því að málalok í slitamáli FME gætu legið fyrir áður en sú niðurstaða lægi fyrir. „FME hefur gert kröfu um að félagið verði tekið til slitameðferðar. Eftirlitið vill meina að því beri að gera það eftir að starfsleyfið var afturkallað. Mér fyndist það mjög undarleg niðurstaða, en það er krafa FME. Þetta er eins og að framfylgja dauðadómi á meðan hann er í áfrýjun. Slitameðferð er nokkuð endanleg.“

Núverandi starfsemi félagsins felst fyrst og fremst í úrvinnslu á eignasafni Sögu og uppgjöri við kröfuhafa þess. Að sögn Hersis er þó vilji á meðal hluthafa Sögu að hefja sambærilega starfsemi og var í fyrirtækinu áður fyrr en í smækkaðri mynd.

„Við gerum það ekki án starfsleyfis. Ef það kemur inn slitastjóri þá tekur hann völd hluthafafundar og stjórnar. Hlutverk hans er þá að innkalla kröfur og tryggja að þær séu réttar.“

thordur@frettabladid.is