Stjórnarformaður FME segir Gunnar ekki vera rekinn

Stjórn Fjármálaeftirlitsins (FME) tilkynnti Gunnari Þ. Andersen, forstjóra stofnunarinnar, á föstudag að til standi að segja honum upp störfum. Gunnar hefur gegnt starfi forstjóra FME frá því í apríl 2009 en hann hefur frest til dagsins í dag til að andmæla ákvörðun stjórnarinnar.

„Ég og lögmaður minn kláruðum andmæli mín nú í dag [í gær] og þau verða send inn á morgun [í dag]. Síðan sjáum við bara hvað gerist,“ segir Gunnar Þ. Andersen.

Formlega hefur Gunnari þó enn ekki verið sagt upp störfum og segir Aðalsteinn Leifsson, stjórnarformaður FME, óvíst hvort svo verði.

„Það hefur ekki verið tekin ákvörðun um að segja Gunnari upp störfum og ég veit ekki hvort sú ákvörðun verði tekin,“ segir Aðalsteinn og bætir við að í kjölfar umfjöllunar Kastljóss hafi stjórnin sett ítarlegt og faglegt ferli af stað til að fara yfir efnisatriði málsins. Málið hafi ratað inn í opinbera umræðu áður en því ferli hafi verið lokið sem sé miður. Auk Aðalsteins skipa stjórnina Arnór Sighvatsson, aðstoðarseðlabankastjóri, og Ingibjörg Þorsteinsdóttir, dósent.

Tilkynning stjórnarinnar til Gunnars byggir á álitsgerð sem Ástráður Haraldsson, hæstaréttarlögmaður, og Ásbjörn Björnsson, endurskoðandi, unnu að ósk stjórnarinnar um hæfi Gunnars.

Forsaga málsins er sú að árið 2010 vann Andri Árnason, hæstaréttarlögmaður, greinargerð um hæfi Gunnars í tilefni af umfjöllun í skýrslu rannsóknarnefndar Alþingis um ákveðin viðskipti Landsbankans og aflandsfélaga hans fyrir um áratug. Þá starfaði Gunnar sem framkvæmdastjóri hjá bankanum. Þáverandi stjórn FME fjallaði um álitið og sá ekki ástæðu til að aðhafast.

Í nóvember á síðasta ári fjallaði Kastljós svo um störf Gunnars fyrir Landsbankann og hélt því fram að nýjar upplýsingar hefðu komið fram um hæfi hans. Í kjölfarið óskaði núverandi stjórn FME eftir því að Andri færi yfir umfjöllunina og mæti hvort eitthvað hefði komið fram sem breytti upphaflegu áliti hans. Andri skilaði niðurstöðu 13. janúar síðastliðinn og breytti í engu niðurstöðum sínum. Þegar leitað var til Andra í seinna skiptið var einnig ákveðið að kalla til lögfræðing og endurskoðanda sem myndu yfirfara mat Andra. Seinna var leitað til Ásbjarnar og Ástráðs til að sinna því hlutverki.

Var það mat Ásbjarnar og Ástráðs að fram hafi komið upplýsingar um atvik í starfi Gunnars fyrir aflandsfélög Landsbankans sem séu til þess fallin „að kasta rýrð á hæfi Gunnars Þ. Andersen til að gegna starfi forstjóra [FME]“. Enn fremur segir í greinargerðinni að upplýsingar um atvikin geti truflað starfsemi FME og tafið fyrir uppbyggingu trausts á starfsemi stofnunarinnar. Þá séu atvikin til þess fallin að draga megi í efa trúverðugleika Gunnars en tekið er fram í greinargerðinni að það sé huglæg niðurstaða. Á þessu mati virðist ákvörðun stjórnar FME byggð.

Í álitsgerðinni segir þó einnig að þessi atvik leiði ekki til vanhæfis Gunnars til að gegna skyldum forstjóra. Þá kemur fram í henni eftirfarandi mat höfunda: „Ekki er örgrannt um að sú hugsun leiti á að vandasamt kynni að verða að finna til starfans einstakling sem án athugasemda stenst skoðun af þessum toga.“

Steingrímur J. Sigfússon, efnahags- og viðskiptaráðherra, sagði í kvöldfréttum Stöðvar 2 í gær að hann hefði frétt af ákvörðun stjórnar FME í gegnum fjölmiðla á föstudag. Þá sagði hann mikilvægt að fullt traust ríkti bæði inn á við og út á við á starfsemi FME. Þá mun efnahags- og viðskiptanefnd Alþingis fjalla um uppsögn Gunnars á fastafundi sínum í dag.

magnusl@frettabladid.is