Bankastjórinn segir kröfuhafa sýna skilning

Viðræður eru hafnar um að lengja í lánum Landsbankans gagnvart gamla bankanum. Bankastjóri Landsbankans segir erlenda kröfuhafa sýna greiðsluflæðisvanda Íslands skilning og vonast eftir því að hægt verði að lengja lánin verulega.

?Við viljum minnka greiðslubyrðina með því að færa greiðslustrauminn inn í framtíðina. Það er mikilvægt að það sé gert með þeim hætti að menn telji þjóðarbúið ráða við það,? segir Steinþór Pálsson, bankastjóri Landsbankans, og bætir við: ?Þegar það var samið um skuldabréfið á sínum tíma voru menn kannski ekki með alveg á hreinu myndina af þessu greiðsluflæðisvandamáli sem við sjáum betur í dag.?

Sem stendur er gert ráð fyrir að Landsbankinn greiði þrotabúi gamla bankans að meðaltali 72 milljarða á ári í fjögur ár eftir 2014. Gætu slíkar útgreiðslur á gjaldeyri sett verulegan þrýsting á gengi krónunnar.

Steinþór segir erlenda kröfuhafa átta sig á því að greiðsluáætlunin þurfi að vera raunhæf. ?Við erum með gjaldeyrishöft sem merkir það að ef við borgum þeim eru þeir fjármunir bara fastir hér nema Seðlabankinn samþykki annað. Þess vegna sjá þeir að það þarf að spila saman,? segir Steinþór og bætir við að hann haldi að kröfuhafar sýni stöðunni skilning með þeim fyrirvara þó að ekki hafi verið gengið frá neinum samningi.- mþl