Vegur lokaður vegna snjóflóða frá Ketilás að Siglufirði

Vegur er lokaður vegna snjóflóða og snjóflóðahættu frá Ketilás að Siglufirði.

Þetta kemur fram í tilkynningu frá Vegagerðinni. Þar segir að vetrarfærð er á vegum á Suðurlandi, hálkublettir eða hálka víðast hvar. Hálka er á Sandskeiði en hálkublettir á Hellisheiði og í Þrengslum.

Hálka eða hálkublettir eru á flestum leiðum á Vesturlandi en þæfingsfærð er á Bröttubrekku og verið að hreinsa.

Á Vestfjörðum er hálka eða hálkublettir á flestum leiðum á lálendi. Þæfingsfærð og skafrenningur er á Klettsháls og Innstrandarvegi. Snjóþekja á er á Steingrímsfjarðarheiði og Þröskuldum.

Á Norðurlandi vestra er óvært á Þverárfjalli en verið að hreinsa. Þungfært er frá Hofsós að Ketilás. Þæfingsfærð er á flestum útvegum en hálka eða snjóþekja á öðrum leiðum. Vegurinn frá Ketilás að Siglufirði er lokaður vegna snjóflóðahættu.

Á Norðurlandi eystra er snjóþekja á öllum leiðum og verið að hreinsa. Þæfingsfærð er á leiðinni út á Dalvík og verið að hreinsa einnig er þæfingsfærð á Hálsum.

Á Austurlandi er hálka eða snjóþekja á flestum leiðum og verið að hreinsa. Vegir eru auðir frá Reyðarfirði með ströndin að Höfn.

Á Suðausturlandi er hálka frá Kvískerjum og þaðan vestur úr.