Fá ekki að segja fréttir af réttarhöldunum í dag

Saksóknari fór fram að fréttaflutningur af skýrslustökum aðalmeðferðar í máli ákæruvaldsins gegn Annþóri Kristjáni Karlssyni og Berki Birgissyni, yrði takmarkaður.

Hann vísaði þar í hagsmuni málsins. Ljóst er að aðalmeðferðin mun taka nokkra daga og saksóknari taldi það vera ótækt að vitni og aðrir aðilar málsins hefðu tækifæri til að kynna sér skýrslutöku annarra vitna í gegnum umfjöllun fjölmiðla.

Verjendur lýstu ekki yfir skoðun á þessari beiðni en vildu engu að síður heyra rökstuðning saksóknara fyrir beiðninni.

Dómari benti á að réttarhöldin væru opin en engu að síður þyrfti að taka tillit til hagsmunaaðila og þeirra vitna sem eiga að gefa skýrslu seinna í vikunni. Eftir stutt hlé var tilkynnt að fréttaflutningur af aðalmeðferðinni yrði sannarlega takmarkaður. Þetta þýðir að greina megi frá aðalmeðferðinni eftir skýrslutökur en ekki á meðan þær standa yfir.

Dómara er heimilt samkvæmt annarri málsgrein 11.greinar sakamálalaga að leggja bann við því að greint sé frá því sem gerist í þinghaldi, en þar segir eftirfarandi:

„Þótt þinghald sé háð í heyranda hljóði getur dómari bannað að skýrt verði frá því sem gerist þar ef ætla má að frásögn geti leitt til sakarspjalla eða valdið vandamönnum sakbornings, brotaþola eða öðrum sem ekki eru fyrir sökum hafðir þjáningum eða verulegum óþægindum. (...)"

Þá kemur fram í 114.gr. laganna að á meðan ákærði gefi skýrslu skuli vitni í sama máli ekki hlýða á framburðinn.

Eftir að dómari kynnti ákvörðun sína hóf hann aðalmeðferðina á því minna á reglur um vinnufrið. Sakborningarnir, þeir Annþór og Börkur, fengu að heyra það að þeim yrði tafarlaust vikið úr dómssal, yrðu þeir áminntir fyrir truflun á vinnufrið.