Bubbi þakkar Jóni Ólafs umhyggju í sinn garð

Tónlistarmaðurinn Bubbi Morthens segir á veggnum sínum á samskiptavefnum Facebook að ástæðan fyrir því að jólaplatan hans hafi verið frestað hafi verið vegna fyrirspurnar frá STEF, en sá sem spurði krafðist nafnleyndar, en Bubbi nafngreinir hann engu að síður á samskiptavefnum.

Eins og Vísir greindi frá fyrr í dag þá þarf að fresta jólaplötu Bubba Morthens, líklega um ár, þar sem svo virðist sem misskilningur hafi orðið á milli Senu og Bubba varðandi leyfi fyrir bítlalaginu Across the Universe, sem er í íslenskri útgáfu á plötunni. Því var útgáfunni frestað.

„Jólaplatan mín er mjög líklega komin í frestun í eitt ár vegna fyrirspurnar frá STEF frá manneskju sem krafðist nafnleyndar fyrirspurnin var um hvort leyfi væri komið fyrir Bítlalagi sem á henni er að finna," segir Bubbi á Facebook.

Hann segir ennfremur að hann hafi talið óhæft að gefa lagið út án þess að krefjast sérstaks leyfis. Svo bætir Bubbi við: „Þess má geta að fyrirspurnin kom frá Jóni Ólafssyni framkvæmdastjóra FTT [Félag tónskálda og textahöfunda] og kann ég honum bestu þakkir fyrir umhyggju sína í minn garð."

Þess má raunar geta að Jón, sem starfar sem tónlistarmaður, gerði meðal annars garðinn frægann á tíunda áratugnum með Bítlavinafélaginu.