Tollfrjálst í fríhöfn en rukkað við hliðið

Verð á mörgum vörum í komuverslun Fríhafnarinnar í Flugstöð Leifs Eiríkssonar er yfir leyfilegu hámarksvirði einstaks hlutar, 32.500 krónum. Því þurfa kaupendur að gefa hlutina upp við tollafgreiðslu eftir að hafa keypt þá tollfrjálst skömmu áður, undir sama þaki.

Kaupendur ráða því hvort þeir gefa hlutinn upp við tollverði eða taka áhættuna á að lenda í úrtaki tollsins í græna hliðinu. Það getur haft í för með sér stóraukinn kostað og fyrirhöfn.

Kári Gunnlaugsson, yfirtollvörður í Leifsstöð, segir í samtali við Fréttablaðið að flestir virði lögin og gefi sig fram með hlutina í rauða hliðinu. Fréttablaðið hefur þó staðfesta vitneskju um að nokkuð sé um hið gagnstæða.

?Við getum ekki fylgst nákvæmlega með því að allir sem kaupa vöru yfir þessum mörkum komi í rauða hliðið, en okkar tilfinning er að fólk vilji hafa þessa hluti í lagi.?

Aðspurður segir Kári að ekki hafi komið til tals að tollurinn og Fríhöfnin hafi með sér samstarf um að tryggja að hlutirnir séu gefnir upp í rauða hliðinu. Slíkt myndi aldrei ganga upp. Kári bætir þó við að fólki komi jafnan á óvart hversu lítið það þurfi að borga af vörunum, enda séu ekki innheimt gjöld af öllu virði hlutarins heldur aðeins því sem er umfram 32.500 krónurnar.

?Það er því ekki þess virði að taka áhættuna og þurfa svo að greiða mun meira ef maður er staðinn að verki.?

Aðspurður segir Kári að fólk sem er staðið að því að reyna að koma tollskyldum varningi með ólöglegum hætti inn í landið fari ekki á sakaskrá, nema sektin sem um ræði sé yfir 50.000 krónum.

Ólafur Ingi Ólafsson, verslunarstjóri Elko í Leifsstöð, segir aðspurður um slíka samhæfingu að álagning tilheyrandi gjalda á vöru sem er yfir 32.500 í versluninni sé ekki góður kostur. Ástæðurnar eru meðal annars þær að vöruúrvalið breytist jafnt og þétt og eins skipti máli hversu mikið af tollskyldum kaupvarningi komufarþegar hafi með sér til landsins.

?Það hefur komið til tals, og við getum reiknað út einstaka hluti. Hins vegar er fólk kannski með meiri varning með sér að utan sem það þarf líka að gera grein fyrir. Þannig verður sú upphæð sem það greiðir í rauða hliðinu allt önnur upphæð en við gefum því.?

Ólafur segir þó að starfsfólk Elko hafi það sem starfsreglu að benda fólki á að koma við í rauða hliðinu ef það kaupir hluti sem eru yfir 32.500 króna markinu.

thorgils@frettabladid.is