Búið að skera niður um tæpa þrjá milljarða til lögreglunnar

Skorið hefur verið niður um 2,8 milljarða króna í löggæslumálum á Íslandi frá hruni, eða um 0,5%. Þetta kom fram í svari Ögmundar Jónassonar innanríkisráðherra, þegar hann svaraði spurningu Sivjar Friðleifsdóttur, þingmanns Framsóknarflokksins, um hvort þetta væri rétt upphæð.

Það var þingmaður Sjálfstæðisflokksins, Jón Gunnarsson, sem hóf umræðu um skipulagða glæpastarfsemi hér á landi á Alþingi í morgun. Hann vill að forvirkar rannsóknarheimildir verði samþykktar á Alþingi auk þess sem hann sagði það ógnvekjandi að lögreglumönnum og fjölskyldum þeirra væri hætta búin vegna skipulagðrar starfsemi.

Í fyrirspurn sinni spurði hann Ögmund hvort hann teldi lögregluna hér á landi í stakk búna til þess að takast á við síaukna skipulagða glæpastarfsemi hér á landi. Svar Ögmundar var já. En það var þó ekki afdráttarlaust. Hann sagði að ávallt mætti gera betur en tók enga afstöðu til rannsóknarheimildanna.

Meðal þess sem kom fram í máli þingmanna var að 80 lögreglumenn af 800 hafa misst vinnuna eftir hrun. Ríkislögreglustjóri metur þó sem svo að embættið þurfi 900 lögreglumenn til þess að sinna löggæslu á Íslandi með myndarlegum hætti.

Þá komu fram sjónarmið Hreyfingarinnar, sem Margrét Tryggvadóttir, vakti fyrst máls á, um að taka þyrfti á fíkniefnavandanum hér á landi með nýjum hætti. Hún benti í þessu samhengi á skýrslu Global Commission on Drug, þar sem fram kemur að fíkniefnastríðið sé tapað. Það þurfi að takast á við vandann með nýjum aðferðum, jafnvel lögleiða fíkniefni að einhverju marki.

Þór Saari, einnig þingmaður Hreyfinginnar, lagði til að innanríkisráðuneytið þýddi þessa skýrslu og legði hana fyrir þingið til umræðu.