Enn allt á huldu vegna barnaárásar í Bökkunum

Enn hefur ekkert spurst til foreldra sem hlut eiga að máli í árás sem átti að hafa átt sér stað í Bökkunum í Breiðholti um helgina. Fréttablaðið greindi frá því á mánudaginn að fjórir piltar á aldrinum 12-13 ára hefðu gengið illilega í skrokk á sex ára gömlum dreng. Rætt var við Þórarinn Engilbertsson knattspyrnuþjálfara sem sagðist hafa komið að piltunum þar sem þeir voru að misþyrma drengnum.

Þórarinn sagði meðal annars í viðtali við Fréttablaðið að hann hefði hlaupið uppi einn drenginn sem gaf honum þær skýringar að piltarnir hafi viljað taka fótbolta af sex ára gamla drengnum.

Í fyrstu var því haldið fram að drengurinn væri kinnbeins- og handleggsbrotinn. Síðar kom í ljós að hann átti að hafa tognað alvarlega á annarri hendi og hlotið áverka í andliti.

Samkvæmt upplýsingum frá lögreglunni á höfuðborgarsvæðinu hefur ekkert spurst til foreldranna eftir að lögreglan hóf rannsókn á málinu eftir að hafa lesið um það í fjölmiðlum. Búið er að taka skýrslu af Þórarni en í viðtali Fréttablaðsins kemur fram að hann hafi rætt við foreldra fórnarlambsins vegna málsins.

Lögreglan lýsti eftir foreldrunum í gær en engin viðbrögð hafa fengist. Miðað við hversu mikla athygli málið fékk segir Gylfi Sigurðsson, aðalvarðstjóri hjá lögreglunni í Kópavogi að það sé skrýtið að engin hafi sett sig í samband við lögregluna.

Rannsókn heldur þó áfram.