Brú yfir Fossvog fyrir hjólandi og gangandi

„Um nokkurt skeið hefur verið rætt hér í Kópavogi um að leggja brú þarna yfir og höfum við heyrt að borgaryfirvöldum lítist vel á það," segir Birgir H. Sigurðsson, skipulagstjóri Kópavogsbæjar, um hugmynd tveggja arkitekta um göngu- og hjólabrú yfir Fossvog.

Samkvæmt tillögu arkitektanna Jakobs Líndals og Kristjáns Ásgeirssonar er gert ráð fyrir þrjú hundruð metra brú frá Kársnesi yfir að brautarenda Reykjavíkurflugvallar. Í miðjunni yrði snúningsbrú til að hleypa bátum í gegn.

„Þetta hefur alltaf legið í loftinu og það hefur verið vilji beggja vegna frá," segir Jakob Líndal sem kveður brúna mundu skapa margvíslega möguleika. Til dæmis skapist ný hringleið og vaxandi fjöldi hjólreiðamanna allt suður í Hafnarfjörð fái nýja leið inn á háskólasvæðið í Öskjuhlíð og Vatnsmýri og inn í miðborgina sjálfa. Kársnesið myndi opnast sem búsetumöguleiki fyrir háskólaborgara, meðal annars á landfyllingu Kópavogsmegin og innan við hina áætluðu brú. Þar hefur nýtt bryggjuhverfi verið samþykkt.

„Ekki er hægt að segja til um það á þessari stundu hvort og þá hvenær eitthvað verði af hugmyndum í þessa veru – en vonandi skýrist það þegar lengra líður á haustið og vinnu sveitarfélaganna, Kópavogs og Reykjavíkur, miðar áfram," segir skipulagstjórinn í Kópavogi.- gar / sjá síðu 4