Koma ekki í veg fyrir vefþrjóta á sölutorgi

Fjölmörg dæmi eru um að á íslenskum vefsölutorgum finnist auglýsingar erlendra þrjóta sem hafa það eitt að leiðarljósi að hafa peninga af fólki. Mikil umræða hefur til að mynda skapast um það á Bland.is hvort ekki sé hægt að koma í veg fyrir að þrjótarnir fái að birta auglýsingar sínar á vefnum. Ekki hefur þó verið gripið inn í.

Einn notandi á Bland.is segist hafa haft samband við vefstjórann um leið og hann áttaði sig á því að verið væri að spila með hann. Engin svör fengust og svo virðist sem ekkert hafi verið gert og þrjóturinn fær að „ganga laus“ án þess að við honum sé varað.

Þrátt fyrir ítrekaðar tilraunir hefur forsvarsmaður Bland.is ekki svarað Fréttablaðinu.

Margar ábendingar um svikaauglýsingar hafa borist í kjölfar umfjöllunar blaðsins um atvik þar sem reynt var að svindla á notanda Bland.is.

Ómögulegt getur verið að rekja hvar þrjótarnir eru niður komnir. Það þarf ekki endilega að vera að þeir séu frá því landi sem þeir segjast vera. Þá er mjög ólíklegt að þeir noti sitt rétta nafn.

Þrjótarnir eru hins vegar ekki alltaf á eftir vörum heldur þykjast líka vera að selja þær. Á Bland.is er auglýsing sem lesandi blaðsins segir að sé svikamylla. Þar auglýsir spænskumælandi notandi dýrar Apple-vörur eins og síma og spjaldtölvur. Þar biður hann um að borguð séu 60 prósent uppsetts verðs inn á reikning hjá erlendri greiðsluþjónustu og þegar sá hluti er kominn verði varan send til viðkomandi. Það gerist hins vegar ekki.birgirh@frettabladid.is