Fjórtán hundruð börn skráð í fimleikadeild Gerplu

Fjórtán hundruð börn eru skráð fyrir haustið í fimleikadeild Gerplu. Hætt var að taka börn inn á biðlista eftir Verslunarmannahelgi. Þá var þegar búið að skrá meira en eitt þúsund börn sem dreymir um að æfa fimleika sum þeirra hafa beðið í þrjú ár.

Gott gengi Gerplu í fimleikum, vinsældir Íþróttaálfsins og nýafstaðnir Ólympíuleikar eiga sjálfsagt stóran hluta í vaxandi áhuga meðal barna á fimleikum.

Þegar félagið tók til starfa í Versölum í Kópavog fyrir sjö árum voru iðkendur 600. Nú eru þeir um 1400 og er húsnæðið fullnýtt frá því að skóla lýkur í Salaskóla og fram til 10- 11 á kvöldin.

Þótt formaður Gerplu gleðjist yfir vakningu á íþróttinni segir hann hryggilegt að ekki sé hægt að bregðast við henni, þúsund börn hafi verið komin á biðlista snemma í ágúst. Þá hafi ekki annað verið hægt en að loka fyrir frekari skráningu. Það sé dapurlegt og sárt til þess að vita að sum börn hafi beðið í um þrjú ár án þess að komast að.

„Því miður þegar við erum komin með yfir þúsund börn á biðlista þá hryggir það okkur mjög," segir Jón Finnbogason, formaður Gerplu.

Hann vonast til þess að Kópavogsbær geti brugðist við þessari þróun. Það eigi ekki að vera forréttindi að fá að æfa fimleika. Nauðsynlegt sé að bregðast við stöðunni og auka aðstöðuna í samræmi við vaxandi áhuga.

„Við biðjum foreldra og börn að vera þolinmóð því við munum reyna áfram að vinna að lausn þessa máls," segir Jón. „Við þurfum nauðsynlega að vera með þessa starfsemi á fleiri stöðum og komast þá að í fleiri íþróttahúsum í Kópavogi."