Óljós ráðherrakapall Jóhönnu - breytingar kynntar á morgun

Breytingar á ráðherraliði Samfylkingarinnar verða kynntar í fyrramálið. Málið var ekkert rætt á ríkisstjórnarfundi í morgun.

Um mánaðarmótin taka gildi breytingar á ráðuneytunum þannig að þeim mun fækka í átta og á sama tíma mun Katrín Júlíusdóttir iðnaðaráðherra snúa til baka úr barneignaleyfi. Að loknum ríkisstjórnarfundi í morgun var Jóhanna spurð hvort Katrín muni setjast í ráðherrastól á nýjan leik.

„Það skýrist á þingflokksfundi sem haldinn verður í fyrramálið og í framhaldi af því á flokkstjórnarfundi sem tekur afstöðu til minnar tillögu," sagði Jóhanna en þingflokksfundurinn hefst á hótel Nordica klukkan hálfníu og strax í framhaldinu hefst flokksstjórnarfundurinn á sama stað.

Aðspurð sagði Jóhanna að hrókeringarnar hefðu hinsvegar ekkert verið ræddar á ríkisstjórnarfundinum í morgun.

Heimildarmenn fréttastofu segja að Jóhanna hafi haldið spilunum þétt að sér í þessum ráðherrakapli og því er enn óvíst hvað hún hyggst leggja til á morgun.

Flestir virðast þó reikna með því að Katrín Júlíusdóttir snúi til baka og að Oddný G. Harðardóttir fjármálaráðherra gefi þá stólinn eftir. Þá nefna sumir að kapallinn gæti orðið flóknari, þannig að Guðbjartur Hannesson velferðarráðherra taki við fjármálaráðuneytinu og Katrín færist yfir í velferðarráðuneytið.