Vill að Alþingi kaupi Landsímahúsið undir skrifstofur

Falla á frá byggingaráformum á skrifstofuhúsnæði Alþingis við Austurvöll en kaupa þess í stað gamla Landssímahúsið við Austurvöll. Þá þarf að fara fram á að borgarstjóri geri bragarbót á svæðinu en það hefur verið illa hirt að undanförnu. Þetta kom fram í máli þingmanns í umræðu um störf þingsins í morgun.

Álfheiður Ingadóttir, alþingismaður VG, vill að Alþingi kaupi Landsímahúsið við Austurvöll og breyti því í skrifstofuhús fyrir alþingismenn og falli þar með frá hugmyndum um byggingu nýs skrifstofuhúsnæðis alþingismanna á svæði þar sem unnið hefur verið að fornleifauppgrefti.

Fyrirhugað er að eftir að uppgreftrinum lýkur í sumar verði byrjað að byggja hús sem sameinar aðstöðu þingmanna sem hún er dreifð í húsum í nágrenni við Alþingishúsið.

Álfheiður hvetur til endurskoðunar á þessum hugmyndum. Uppi væru hugmyndir um að breyta Landssímahúsinu í hótel en nær væri að Alþingi leitaði eftir því að kaupa það og breyta því í skrifstofuhús fyrir alþingismenn.

Fornleifauppgreftinum væru svo gerð góð skil í sátt við það sem þegar væri á svæðinu.

Þá lýsti Álfheiður yfir óánægju með umgengni á Austurvelli. Hún sagði að Reykjavíkurborg hefði ekki staðið sig nægilega vel við að þrífa Austurvöll og senda verði tillmæli um bragarbót þar á til borgarstjóra.