Tímamót á kvenréttindadegi

Tímamótastaðall um launajafnrétti kynjanna var kynntur í morgun, hann á að tryggja launajafnrétti innan hvers vinnustaðar. Velferðarráðherra segir þetta reynt í fyrsta skipti í heiminum hér á landi.

97 ár eru liðin frá því að konur fengu fyrst kosningarétt hér á landi en þessa tímamóta er minnst með kvennafrídeginum. Forseti borgarstjórnar minntist tímamótanna auk þess með því að leggja blómsveig að leiði kvenréttindakonunnar Bríetar Bjarnhéðinsdóttur.

Og kynntur var tímamóta staðall sem á að tryggja launajafnrétti kynjanna. ASÍ, Samtök atvinnulífsins forsætis- og velferðaráðuneytið hafa haft forgöngu að gerð hans.

„Þarna er verið að gera tilraun til að búa til staðal sem fyrirtæki geta síðan tekið upp," segir Guðbjartur Hannesson, velferðarráðherra. „Þar sem tryggt er að farið sé eftir ákveðnum ferlum til þess að skilgreina jafnrétti á vinnustaðnum hvað varðar launakjör og öll fríðindi."

Jóhanna Sigurðardóttir forsætisráðherra segir staðalinn lúta öllum alþjóðlegum reglum sem settir eru um staðla og því sé hann vottunarhæfur að öllu leyti.

Yfir 20 manna nefnd fólks frá ýmsum hagsmunaaðilum koma að gerð hans og tók um þrjú og hálft ár að vinna hann eða frá því að jafnréttislögin voru samþykkt árið 2008.

„Þetta er mjög spennandi áfangi," segir Guðbjartur. „Þetta er búið að taka langan tíma, einfaldlega vegna þess að þetta er í fyrsta skipti í heiminum þar sem verið er að gera svona tilraun. Þarna er verið að reyna að setja jafnréttismálin á sama grundvöll og til dæmis umhverfismál og annað sem metið er í fyrirtæki eftir ISO stöðlum."