Endurgreiddi 100 þúsund króna brúðkaupsgjöf til Vilhjálms

Sigurður Helgi Guðmundsson fyrrverandi framkvæmdastjóri hjúkrunarfélagsins Eirar, hefur endurgreitt Eir 100 þúsund krónur sem Eir gaf Vilhjálmi Þ. Vilhjálmssyni, fyrrverandi stjórnarformanni Eirar, í brúðkaupsgjöf. Eins og áður hafði komið fram hefur Sigurður Helgi einnig endurgreitt Eir gjafabréf Icelandair sem hann gaf Jóhannesi Rúnari Jóhannessyni, tengdasyni sínum, sem þakklætisvott fyrir vinnu sem hann vann fyrir Eir.

„Jóhannes Rúnar leit á vinnuframlag sitt sem vinargreiða við tengdaföður og vildi því ekki fara fram á greiðslu fyrir það. Ég ákvað hins vegar að umbuna honum með gjafabréfinu, eins og fram hefur komið. Sú ákvörðun var og er á mína ábyrgð. Jóhannes Rúnar hefur að ósekju verið dreginn inn í opinbera umræðu. Hann hafði aldrei ástæðu til annars en að ætla að gjafabréfið væri frá mér og greitt af mér en ekki með fjármunum úr þróunarsjóði Eirar," segir í bréfi sem Sigurður Helgi sendi fjölmiðlum í morgun.

Sigurður Helgi segir að hinn hluti greiðslunnar, 100.000 kr., varði gjöf sem Vilhjálmur Þ. Vilhjálmsson fór fram á að fá frá Eir í tilefni af brúðkaupi sínu. „Sama hlýtur hins vegar að gilda um mína ábyrgð gagnvart þeirri ákvörðun og gjafabréfinu. Því endurgreiði ég brúðkaupsgjöfina líka hér og nú," segir hann.

Sigurður Helgi segir að Ríkisendurskoðun hafi ekki haft samband við sig til að kalla eftir skýringum og sjónarmiðum eða virða yfirleitt á nokkurn hátt andmælarétt gagnvart sér. „Mér þykja þau vinnubrögð sérkennileg," segir hann.